امتیاز اسلم کا جموں کشمیر جوائنٹ عوامی ایکشن کمیٹی پر بھارتی فنڈنگ کے الزامات کو مسترد، قانونی کارروائی کا اعلان

کوٹلی — جموں کشمیر جوائنٹ عوامی ایکشن کمیٹی (JKJAAC) کے کور ممبر امتیاز اسلم چوہدری نے پاکستان پیپلز پارٹی (پی پی پی) رہنماؤں کی جانب سے لگائے گئے بھارتی فنڈنگ کے الزامات کو سختی سے مسترد کرتے ہوئے انہیں “بے بنیاد اور عوامی تحریک کو بدنام کرنے کی سازش” قرار دیا۔

امتیاز اسلم نے کہا کہ بالخصوص پی پی پی رہنما چوہدری محمد یٰسین کے حالیہ بیانات افسوسناک اور گمراہ کن ہیں۔ انہوں نے خبردار کیا کہ اگر چوہدری یٰسین اپنے دعوؤں کے ثبوت پیش نہ کر سکے تو ایکشن کمیٹی ان کے خلاف عدالت میں ہتکِ عزت کا مقدمہ دائر کرے گی۔ اس مقصد کے لیے قانونی ماہرین سے مشاورت مکمل کر لی گئی ہے۔

انہوں نے مزید کہا کہ آٹے اور بجلی کی قیمتوں میں کمی دراصل ایکشن کمیٹی کی پُرامن عوامی جدوجہد کا نتیجہ ہے۔ “ہماری تحریک کسی سیاسی جماعت کے خلاف نہیں، بلکہ عوام کے بنیادی حقوق کے لیے ہے، اور ہمیشہ پُرامن احتجاج، مذاکرات اور آئینی راستہ اپنایا گیا ہے،” انہوں نے وضاحت کی۔

امتیاز اسلم نے پیپلز پارٹی قیادت پر تنقید کرتے ہوئے کہا کہ الزام تراشی اور پروپیگنڈے کے بجائے عوامی مسائل کے حل پر توجہ دی جائے۔ ان کے مطابق اب عوام باشعور ہو چکے ہیں اور کسی جھوٹے پروپیگنڈے میں نہیں آئیں گے۔

انہوں نے سیاسی کارکنوں اور عوام کی جانب سے ایکشن کمیٹی کے ساتھ اظہارِ یکجہتی کو سراہا اور حکمران طبقے کو خبردار کیا کہ اپنی روش تبدیل کریں، ورنہ عوامی شعور کسی بھی سازش کو ناکام بنا دے گا۔

امتیاز اسلم نے ریاست بھر کی عوام سے اپیل کی کہ وہ 29 ستمبر کے غیر معینہ مدت لاک ڈاؤن کی بھرپور تیاری کریں اور 78 سالہ استحصال کے خلاف باہر نکلیں۔