سعودی عرب کی ایران کے میزائل حملے کی شدید مذمت: “ناقابلِ جواز اور بین الاقوامی قانون کی کھلی خلاف ورزی”

ریاض (دی آزادی ٹائمز نیوز ڈیسک) — سعودی عرب نے ایران کی جانب سے قطر میں واقع امریکی فوجی اڈہ (العديد ایئر بیس) پر میزائل حملے کی شدید الفاظ میں مذمت کرتے ہوئے اسے “بین الاقوامی قوانین اور ہمسائیگی کے اصولوں کی صریح خلاف ورزی” قرار دیا ہے۔

سعودی وزارت خارجہ کی جانب سے جاری کردہ بیان میں کہا گیا ہے کہ:
“یہ ایک قابلِ اعتراض اور ناقابلِ جواز اقدام ہے، جو کسی بھی صورت میں درست نہیں ٹھہرایا جا سکتا۔”

بیان میں مزید کہا گیا کہ سعودی عرب “برادر ریاست قطر کے ساتھ مکمل یکجہتی اور حمایت کا اظہار کرتا ہے”، اور ایران کے اس اقدام کو خطے کے امن و استحکام کے لیے خطرہ تصور کرتا ہے۔

واضح رہے کہ ایران نے گزشتہ رات قطر میں امریکی فوجی اڈے “العدید ایئر بیس” پر میزائل حملہ کیا تھا، جسے قطر کے دفاعی نظام نے کامیابی سے ناکام بنا دیا۔ اگرچہ حملے میں کوئی جانی نقصان نہیں ہوا، تاہم اس واقعے نے خلیج کے ممالک میں شدید سفارتی ردعمل کو جنم دیا ہے۔

سعودی عرب کا یہ بیان ایسے وقت میں سامنے آیا ہے جب خطے میں ایران کے بڑھتے ہوئے اثر و رسوخ اور اس کے عسکری اقدامات پر پہلے ہی تشویش پائی جاتی ہے۔ ماہرین کے مطابق، سعودی عرب اور قطر کی مشترکہ مذمت ایران کے خلاف خلیجی ریاستوں کے ممکنہ متحد موقف کی نشاندہی کر سکتی ہے۔