غزہ: 14 ہزار بچوں کی جانیں خطرے میں، اقوامِ متحدہ کا ہنگامی انتباہ

غزہ (دی آزادی ٹائمز) — اقوامِ متحدہ کے انسانی امداد کے سربراہ ٹام فلیچر نے خبردار کیا ہے کہ اگر فوری طور پر امدادی سامان متاثرہ علاقوں تک نہ پہنچا، تو اگلے 48 گھنٹوں میں 14 ہزار بچوں کی جانیں خطرے میں پڑ سکتی ہیں۔

ان کا کہنا تھا کہ پیر کے روز اگرچہ پانچ امدادی ٹرک غزہ میں داخل ہوئے، لیکن وہ سرحد عبور کرنے کے بعد وہیں رک گئے ہیں اور تاحال کسی بھی متاثرہ علاقے تک نہیں پہنچ سکے۔ ان ٹرکوں میں بچوں کے لیے خوراک اور غذائیت سے متعلق ضروری اشیاء موجود ہیں۔

فلیچر نے اس صورتحال کو “سمندر میں ایک قطرہ” قرار دیتے ہوئے کہا کہ اس محدود امداد سے موجودہ انسانی بحران پر قابو پانا ممکن نہیں۔ انہوں نے عالمی برادری سے اپیل کی ہے کہ امدادی راہیں فوری طور پر کھولی جائیں اور محفوظ طریقے سے متاثرہ علاقوں تک سامان پہنچایا جائے۔

غزہ میں جاری انسانی بحران دن بہ دن شدت اختیار کرتا جا رہا ہے، اور اقوامِ متحدہ کے ادارے متاثرین خصوصاً بچوں کی زندگیاں بچانے کے لیے فوری اور مؤثر اقدامات پر زور دے رہے ہیں۔