مسلم کانفرنس کے سابق امیدوار اسمبلی شراب اور ناجائز اسلحہ کے ساتھ گرفتار

مظفرآباد (نمائندہ خصوصی) — آزاد کشمیر کی سیاست میں ہلچل مچانے والی بڑی کارروائی، پولیس نے کوہالہ کے علاقے میں مسلم کانفرنس کے سابق امیدوار اسمبلی کو شراب اور ناجائز اسلحہ کے ساتھ گرفتار کر لیا۔ اس کارروائی نے نہ صرف عوام بلکہ سیاسی حلقوں میں بھی تہلکہ مچا دیا ہے۔

ایس ایس پی مظفرآباد ریاض حیدر بخاری کی ہدایات پر انسداد منشیات مہم کے سلسلے میں یہ کارروائی عمل میں لائی گئی۔ ایس ڈی پی او صدر مقام راجہ پرویز حمید، ایس ایچ او تھانہ چھتر کلاس محسن علی اعوان اور چوکی آفیسر کوہالہ شفقت نقوی کی قیادت میں پولیس ٹیم نے دوران چیکنگ گاڑی کو روکا، جس سے شراب اور ناجائز اسلحہ برآمد ہوا۔

پولیس کے مطابق ملزمان کے خلاف امتناع منشیات و آرمز ایکٹ کے تحت مقدمہ درج کر لیا گیا ہے، جبکہ انہیں مزید تفتیش کے لیے حراست میں لے لیا گیا ہے۔ حکام نے واضح کیا ہے کہ ملزمان کو جلد عدالت میں پیش کیا جائے گا۔

ایس ایس پی ریاض حیدر بخاری نے میڈیا سے گفتگو کرتے ہوئے کہا کہ پولیس کی کارروائیاں انسداد منشیات اور غیر قانونی اسلحہ کے خلاف جاری مہم کا حصہ ہیں۔ ان کا کہنا تھا:
“قانون کے شکنجے سے کوئی بھی نہیں بچ سکتا، چاہے وہ سیاست سے تعلق رکھتا ہو یا کسی بااثر طبقے سے۔”

اس گرفتاری کے بعد علاقے میں سیاسی و عوامی سطح پر شدید بحث چھڑ گئی ہے، اور عوام نے مطالبہ کیا ہے کہ ایسے عناصر کو کڑی سے کڑی سزا دی جائے تاکہ معاشرے کو منشیات اور اسلحہ کی لعنت سے نجات دلائی جا سکے۔