تراڑ کھل میں امن مارچ: شہریوں کا لائن آف کنٹرول پر فائرنگ کے خلاف احتجاج اور عدالتی تحقیقات کا مطالبہ

تراڑ کھل، آزاد جموں و کشمیر —آج تراڑ کھل شہر میں مختلف قوم پرست تنظیموں کے کارکنان اور شہریوں کی بڑی تعداد نے امن کے حق میں مارچ کیا۔ مارچ شہر کے مرکزی علاقوں سے ہوتا ہوا مرکزی چوک تک پہنچا، جہاں شرکاء نے لائن آف کنٹرول پر افواج کی طرف سے جاری فائرنگ اور گولہ باری کے خلاف شدید احتجاج کیا۔

مارچ کے شرکاء نے پلے کارڈز اٹھا رکھے تھے جن پر “امن ہمارا حق ہے”، “ایل او سی پر گولہ باری بند کرو” اور “غیر ملکی افواج کا انخلا کرو” جیسے نعرے درج تھے۔ مظاہرین نے مطالبہ کیا کہ خطے میں دیرپا امن کے قیام کے لیے بین الاقوامی سطح پر سنجیدہ اقدامات کیے جائیں۔

اس موقع پر مظاہرین نے حالیہ پولیس مقابلے میں جاں بحق ہونے والے نوجوانوں، زرنوش نسیم اور جبران نسیم، کے واقعے پر بھی آواز بلند کی۔ شرکاء نے الزام عائد کیا کہ واقعے کی اصل حقائق کو چھپایا جا رہا ہے اور ایک منصفانہ عدالتی تحقیقات کی فوری ضرورت ہے۔

مظاہرین کا کہنا تھا کہ آزادی اظہار اور سیاسی اختلاف رائے کو دبانے کی کوششیں خطے کے امن کے لیے خطرہ ہیں۔ انہوں نے عالمی برادری اور انسانی حقوق کے اداروں سے اپیل کی کہ وہ اس واقعے کا نوٹس لیں اور آزادانہ انکوائری کو یقینی بنائیں۔

امن مارچ پرامن انداز میں اختتام پذیر ہوا، تاہم شہریوں کے مطالبات اور غم و غصے نے ایک بار پھر خطے میں انسانی حقوق اور سکیورٹی اداروں کے طرز عمل پر سوالات اٹھا دیے ہیں۔